കഴക്കൂട്ടത്ത് വീടിന് തീപിടിച്ചു; ഉറങ്ങിക്കിടന്ന വയോധിക തലനാരിടയ്ക്ക് രക്ഷപ്പെട്ടു

കഴക്കൂട്ടത്ത് വീടിന് തീപിടിച്ചു. വയോധിക തലനാരിടയ്ക്ക് രക്ഷപ്പെട്ടു. കഴക്കൂട്ടം കുമഴിക്കര പുതുവൽ പുത്തൻവീട്ടിൽ റാബിയത്ത് ബീവി (65) ആണ് അത്ഭുതകരമായി രക്ഷപ്പെട്ടത്. ശനിയാഴ്ച പുലർച്ചെ മൂന്ന് മണിയോടെയായിരുന്നു സംഭവം.റാബിയത്ത് ബീവി വീട്ടിനുള്ളിൽ ഉറങ്ങിക്കിടക്കുമ്പോഴാണ് വീടിന് തീപിടിച്ചത്. തീ പടരുന്നത് ശ്രദ്ധയിൽപ്പെട്ട സമീപവാസികൾ ഉടൻ തന്നെ ഓടിയെത്തി റാബിയത്ത് ബീവിയെ വിളിച്ചുണർത്തി പുറത്തെത്തിക്കുകയായിരുന്നു. ഇവരുടെ മകനും ഓട്ടോ ഡ്രൈവറുമായ സുധീർ ഈ സമയത്ത് വീട്ടിലുണ്ടായിരുന്നില്ല.ഷീറ്റ് മേഞ്ഞ വീടായതിനാൽ തീ അതിവേഗം പടരുകയായിരുന്നു. ഫ്രിഡ്ജ്, അലമാരകൾ ഉൾപ്പെടെയുള്ള ഗൃഹോപകരണങ്ങൾ തീപിടുത്തത്തിൽ പൂർണ്ണമായും കത്തിയമർന്നു. സുധീർ മുൻപ് മറ്റൊരു തീവെപ്പ് കേസിൽ പ്രതിയായിരുന്നതിനാൽ, ഈ സംഭവത്തിന് പിന്നിൽ അസ്വാഭാവികതയുണ്ടോ എന്ന് പോലീസ് സംശയിക്കുന്നുണ്ട്. സംഭവത്തിൽ കഴക്കൂട്ടം പോലീസ് വിശദമായ അന്വേഷണം ആരംഭിച്ചു.